Өзбекстан: жеңілістен де жеңіс табатын мундиаль

Өзбектердің мундияльдағы футболын қорытындылай беруге болатын шығар. Иә, әлі бір матч бар. Көбі Конгоны жеңетініне сенімді де үмітті.

Құп, футболда неше түрлі ғажаптар болған. Бірақ, Конгоның құрамына сәл көз жүгіртіп шықсаңыз екен. Олар да қара жаяу емес. Құрамы жағынан өзбектерден анағұрлым мықты.

Уан-Биссака көз ашқалы АПЛ-да ойнап жүр, МЮ құрамында 5 маусым. Қорғаушы Мбембаның мансабына біраз өзбек, қазақ қызығатындай.

Конго ойыншысының қайсысын түртіп қал, жақсы клубтарда жүр.  

Әрине, өзбектер есікті тарс жауып кетсе дейсің. Ал Өзбекстанның ауыз толтыратындай ойыншысын айтшы? Әлбетте Хусанов пен Шомуродовтан бөлек.

Сондықтан иллюзияны қойып, көршілер бұл уақыттан үлкен сабақ түйсе. Өйткенің команда жеңе берсе, көзіңді шел басады, ал жеңіліс бар мәселеңді ашып, жалаң қылады.

Бірақ бәрі сондай жаман емес, кез-келген нәрсені көзіңмен көріп, теріңмен сезінуің керек. Бұл жағынан өзбектер үлкен жеңіспен оралады.

Бәрібір өз халқының алдында олар қаһармандар. Қалай дегенмен 40 млн халықтан бөлек, айналасындағы елдерді шулатын, аузына қаратты. Көпке үміт, сенім сыйлады. 

Ал, бізге бұл мундиаль Өзбекстан құрамасының призмасымен қарасақ не берді? Бергені көп болды. Тіпті іріктеуден өткен кездің өзінде, біздің елдің футболында дүмпу болып, клубтар жеке өте бастады, стадиондар, академиялар салына бастады. Бұл оқиағаларды мына мен, 20 жыл уақытымды футболға арнап, тірі кезімде болмайтын шығар деп күдер үзгенмін.

Ал, көршілер топтан шыққанда, эффект мүлдем басқаша болар еді.

Рымбек Ізғали